Գեղարքունիքի մարզի ընդհանուր իրավասության առաջին ատյանի դատարանի դատավոր Արտավազդ Կարապետյանի վճռով ցմահ ազատազրկման է դատապարտվել Գեղարքունիքի մարզի բնակիչ Արմեն Օհանեսովը։
Դատական գործընթացը սկիզբ առավ այն բանից հետո, երբ 2022 թվականին ծնված Տիգրան Օվանեսովը անհետացավ։ Երեխայի դին հայտնաբերվեց նոյեմբերի 2-ին Ծափաթաղ գյուղին հարակից Ջիլ գյուղի ցուցանակից մոտ 60 մետր հեռավորության վրա գտնվող դաշտամիջյան հատվածում։
ՀՀ ՆԳ նախարար Արփինե Սարգսյանը նոյեմբերի 3-ին հայտարարեց, որ 3 տարեկան Տիգրանին, ըստ նախնական տվյալների, խեղդել է հայրը՝ Արմեն Օհանեսովը։ Այս դեպքի կապակցությամբ Արմեն Օհանեսովի նկատմամբ հանրային քրեական հետապնդում էր հարուցվել սպանության հոդվածով, որից հետո նա դատարանի որոշմամբ կալանավորվեց։