Ապրիլի 29-ին Ազգային Ժողովի պետաիրավական հարցերի մշտական հանձնաժողովին ներկայացվեց ՀՀ գլխավոր դատախազության 2025 թվականի գործունեության մասին հաղորդումը։ Այս համատեքստում ներկայացվեց ՀՀ զինված ուժերում և այլ զորքերում արձանագրված դեպքերի վերլուծությունը։
Ըստ ներկայացված տվյալների՝ 2025 թվականին զորամասերում արձանագրվել է ընդհանուր առմամբ 2248 դեպք։ Դրանցից 1027-ը կամ 45 տոկոսը պատահարներ են եղել, որոնք չեն համարվում հանցագործություններ, իսկ 1221-ը կամ 54,3 տոկոսը՝ հանցագործություններ։
Հանցագործությունների շարքում առանձնացվել են զինվորական (687 դեպք, 56,3 տոկոս) և այլ (534 դեպք, 43,7 տոկոս) տեսակի դեպքեր։
Վերլուծության համեմատական տվյալները ցույց են տալիս, որ 2024 թվականի համեմատությամբ պատահարների թիվը աճել է 265-ով կամ 34 տոկոսով, մինչդեռ հանցագործությունների թիվը նվազել է 110-ով կամ 8,3 տոկոսով։ Ընդհանուր բնույթի հանցագործությունները նվազել են 82-ով կամ 13 տոկոսով, իսկ զինվորական հանցագործությունների դեպքերը՝ 28-ով կամ 3,9 տոկոսով։
ՀՀ զինված ուժերում 2025 թվականին սպանության դեպք չի արձանագրվել։
Անդրադառնալով ծառայության հետ կապված մահվան դեպքերին՝ նշվել է, որ 2025 թվականին ՀՀ զինված ուժերում և սահմանապահ զորքերում (որոնք ենթակա են ԱԱԾ-ին) արձանագրվել է ընդհանուր 9 դեպք։ Դրանք ներառում են 6 ժամկետային զինծառայող, 2 սահմանապահ զորքերի ժամկետային զինծառայող և 1 աշխարհազորային։ Այս թիվը զգալիորեն նվազել է 2024 թվականի 27 դեպքի համեմատ՝ կազմելով 66 տոկոսի նվազում։
Ծառայության հետ կապված մահվան պատճառները բազմազան են եղել՝ անզգուշությամբ ինքնասպանություն (4 դեպք), զինվորական պաշտոնեական անփութություն (1 դեպք), բուժաշխատողի կողմից մասնագիտական պարտականությունների ոչ պատշաճ կատարում (1 դեպք), կայծակնահարություն (1 դեպք) և հիվանդություն (2 դեպք)։