Երեկ Շիրակի պետական համալսարանում ելույթ ունենալիս Եվրոպական Միության ընդլայնման հանձնակատար Մարթա Կոսը լսարանին ներկայացրեց մի քանի հետաքրքիր պատմություններ, որոնք, սակայն, ծառայում էին ավելի խորը իմաստի փոխանցմանը։
Խոսելով վիզայի ազատականացման հնարավորության մասին՝ տիկին Կոսը նշեց, որ այսօր, նախքան համալսարան գնալը, այցելել է Շիրակի մարզի գյուղերից մեկի հացաբուլկեղենի արտադրամաս։ Այնտեղ, համտեսելով տեղի արտադրված գաթան, նա պատմեց մի զուգադիպության մասին։
«Ես գաթայի միջից գտա մետաղադրամ, բայց մինչ այդ սենյակում գտնվող տղամարդկանցից մեկը, իսկապես զուգադիպություն էր, ասաց՝ «եթե գտնեք մետաղադրամը, տիկին հանձնակատար, մենք պիտի ստանանք վիզաների ազատականացում»։ Այսպիսով՝ սա է մեր այսօրվա պայմանավորվածությունը․ ես ուտում եմ ձեր գաթան, իսկ մենք ձեզ մոտեցնում ենք Եվրոպային՝ առանց վիզայի ռեժիմի»,- ասաց նա։
Այս պատմությունը, որը հումորով էր ներկայացված, ցույց էր տալիս ԵՄ-ի մոտեցումը Հայաստանի հետ հարաբերությունների հարցում։
Մարթա Կոսը նաև հիշեց իր այցելության նախորդ օրվա մասին։ Նա պատմեց, որ թիմի հետ հանդիպման ժամանակ նրան խորհուրդ էին տվել՝ «Գյումրի գնալիս ասեք՝ փող չկա»։ Տիկին Կոսն այդ խորհուրդը գրառել էր, սակայն տեղ հասնելով՝ հանեց իր գրառումը և հայերեն լեզվով ասաց՝ «Փող կա»։
«Գումարը խնդիր չէ, պետք է պարզապես այն խելացի ծախսել, Եվրոպան ունի գումարներ լավ ծրագրերի համար»,- եզրափակեց նա՝ ընդգծելով, որ Եվրոպական Միությունը պատրաստ է աջակցել Հայաստանին տարբեր ծրագրերի իրականացման գործում։