Մարտի 9-ի երեկոյան Երևանի Աջափնյակ վարչական շրջանի դպրոցներից մեկում տեղի է ունեցել արտառոց դեպք։ Ժամը 21։30-ի սահմաններում «Մուրացան» համալսարանական հիվանդանոցային համալիրը զանգահարում է ՀՀ ՆԳՆ ոստիկանության համայնքային ոստիկանության գլխավոր վարչության Մաշտոցի բաժինը՝ տեղեկացնելով, որ իրենց մոտ է տեղափոխվել 8-ամյա երեխա՝ «որովայնի սալջարդ» ախտորոշմամբ։
Ինչպես պարզվել է, նույն օրը՝ ժամը 08։20-ի սահմաններում, «Պեյո Յավորովի անվան» թիվ 131 հիմնական դպրոցի 2-րդ Բ դասարանում 8-ամյա աշակերտներից մեկը հրել է իր դասընկերոջը, գցել հատակին և ոտքերով հարվածել վերջինիս մեջքին։
Դեպքի մասին տեղեկություն ստանալով՝ ոստիկանության Մաշտոցի բաժնի հերթապահ խումբը՝ ավագ համայնքային ոստիկանի գլխավորությամբ, անմիջապես մեկնել է դեպքի վայր։ Դեպքի փաստով ոստիկանության Մաշտոցի բաժնում կազմվել են համապատասխան փաստաթղթեր, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժին։ Դեպքի մանրամասները պարզվում են։