Այսօր՝ փետրվարի 22-ին, Երևանում տեղի ունեցավ ողբերգական դեպք։ Ժամը 15։50-ի սահմաններում ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտում ստացվեցին օպերատիվ տեղեկություններ, որ Հաղթանակ կամրջի տակ՝ Հրազդան գետում, դի կա։
Դեպքի վայր են անմիջապես ժամանել պարեկային ծառայության ուժերը՝ գումարտակի հրամանատար Գոռ Առաքելյանի, գումարտակի հրամանատարի տեղակալ Դավիթ Նիկողոսյանի և վաշտի հրամանատար Հայկ Արոյանի գլխավորությամբ։ Տարածքը սահմանազատվեց։
Ավելի ուշ դեպքի վայր ժամանեցին նաև ՀՀ ՆԳՆ ոստիկանության համայնքային ոստիկանության գլխավոր վարչության Կենտրոնական բաժնի հերթապահ խումբը՝ օրվա պատասխանատու հերթապահի գլխավորությամբ։
Պարզվել է, որ ստացված տեղեկությունը հավաստի է։ Հրազդան գետի մեջտեղում հայտնաբերվել է տղամարդու մարմին։ Սակայն հետագայում պարզ դարձավ, որ տվյալ տարածքը սպասարկվում է ոչ թե Կենտրոնական բաժնի, այլ ՀՀ ՆԳՆ ոստիկանության համայնքային ոստիկանության գլխավոր վարչության Մալաթիայի բաժնի կողմից։ Դեպքի վայր ժամանել է օպերատիվ խումբը՝ բաժնի պետ Կարեն Բունիաթյանի գլխավորությամբ։
Դեպքի մասին տեղեկությունը փոխանցվել է ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժին, որտեղից ժամանել է քննչական խումբը՝ բաժնի պետի և օրվա պատասխանատու հերթապահ քննիչի գլխավորությամբ։
Դեպքի փաստով քննչական բաժնում նախաձեռնվել է քրեական վարույթ, որի շրջանակում պարզվում են մահացածի ինքնությունը և դեպքի հանգամանքները։
Մահացածի մարմինը գետից դուրս բերելու համար ահազանգով ժամանել են ՀՀ ՆԳՆ փրկարար ծառայության Երևանի հրշեջ-փրկարարական ջոկատներից մեկի փրկարարները։ Տեղում պարզվում է նաև, թե տեղի ունեցածը ինքնասպանություն է, սպանություն, թե դժբախտ դեպք։ Ֆոտոլրագրողի տեղեկություններով՝ մահացածը նախկինում աշխատել է դատախազության համակարգում։