Իրանի և Իսրայելի միջև ընթացող հակամարտության երրորդ շաբաթը մոտենում է իր ավարտին, սակայն պատերազմը դադարեցնելու որևէ նախանշան դեռևս չկա։ Իրանի պաշտպանության նախարարության մամուլի խոսնակ գեներալ Ռեզա Թալաի-Նիկը հայտարարել է, որ իր երկրի զինված ուժերը պատրաստ են շարունակել ռազմական գործողությունները մինչև թշնամին կանգ չառնի կամ չընդունի կապիտուլյացիան։ Նա նաև նախազգուշացրել է, որ Իրանը պահպանում է ցանկացած կետի հարվածելու բոլոր հնարավորությունները, և եթե նրա էներգետիկ համակարգը ենթարկվի հարձակման, ապա ամբողջ տարածաշրջանը կհոսանքազրկվի։
Իսրայելցի քաղաքագետ Ալեքսանդր Ցինկերը, ով խորհրդարանի նախկին պատգամավոր է, նշում է, որ իսրայելա-ամերիկա-իրանյան պատերազմը դադարեցնելու «ինստիտուցիոնալ հարթակ դեռևս չի ձևավորվել»։ Նա հատուկ կարևորություն է տալիս անցյալ շաբաթ Սաուդյան Արաբիայում տեղի ունեցած արաբական և մուսուլմանական տասներկու երկրների արտգործնախարարների խորհրդատվական հանդիպմանը, որի մասնակիցները դատապարտել են Իրանի հրթիռային հարվածները, սակայն համարում է, որ այդ հարթակը «բավարար ազդեցություն չունի, որպեսզի Թեհրանին համոզի ընդունել առկա իրողությունները»։
Ըստ Ցինկերի, պատերազմը դադարեցնելու գլոբալ հնարավորություն կարող է ունենալ Չինաստանը, որը, թերևս, առաջինն է դարձել այդ պատերազմի տուժող կողմերից։ Քաղաքագետը հավանաբար հույս է կապում ԱՄՆ և Չինաստանի առաջնորդների հանդիպման հետ, որը, սակայն, հետաձգվել է։ Փորձագետների մեծ մասը համոզված է, որ ԱՄՆ նախագահ Դոնալդ Թրամփը «չի ցանկացել դատարկաձեռն ներկայանալ Սի Ծինփինի հետ հանդիպմանը, որի ընթացքում նրա հաղթաթուղթը պետք է լիներ Իրանի դեմ հաղթանակը»։
Իսրայելցի նախկին խորհրդարանականը իրավիճակի հանգուցալուծման ամենաօպտիմալ տարբերակ է տեսնում Իրանի ղեկավարության ներսում համաձայնության ձեռքբերման, որի շուրջ կձևավորվի երկրի առաջնորդի թեկնածությունը, ով կարող է ստեղծված իրավիճակը ժողովրդին ներկայացնել որպես միակ շահավետ տարբերակ։ Նա չի բացառում, որ Միացյալ Նահանգները կարող են ոչ միայն պատժամիջոցները մեղմել, այլև համաձայնության գալ Իրանի ռազմական հզորության չափորոշիչների հարցում՝ բացի, իհարկե, միջուկային զենքից։
Այս վերլուծականից կարելի է եզրակացնել, որ Իսրայելում Իրանի դեմ պատերազմով, մեղմ ասած, ոգևորված չեն։ Իրականությանը, ամենայն հավանականությամբ, չեն համապատասխանում այն լուրերը, որ «Իրանը կորցրել է հրթիռների մեծ մասը, իսկ դրանց արձակման հարթակները հիմնականում ոչնչացված» են։ Թեհրանը միաժամանակ ակտիվ դիվանագիտություն է իրականացնում։
Թերևս, ճիշտ է axsios-ի մեկնաբանի գնահատականը, որ «պետերազմող կողմերը մտել են հանրային փորձության փուլ»։ Նրա գնահատմամբ՝ «Իրանը ծրագրել է մարտական գործողությունները շարունակել մինչև աշուն, երբ կսկսվի Կոնգրեսի միջանկյալ ընտրությունների քարոզարաշավը, և դեմոկրատները գործը ավարտին կհասցնեն»։
Կա կոնսենսուս, որ Հորմուզի նեղուցը չի վերածվելու Հրվ. Կովկասի. այն կմնա բաց և երթևեկելի բոլորի համար։ Հանրությունը կրկին կանգնած է «կոտրած տաշտակի» առաջ. վերարտադրվում է 2021-ի «չընտրության» իրավիճակը։ Պատերազմի ռացիոնալ հաշվարկը բախվել է մոլեռանդությանը, ինչը դարձնում է Թրամփի հաջորդ քայլի կանխատեսումը գրեթե անհնար։