Իրանի արտաքին գործերի նախարար Աբբաս Արաղչին հայտարարել է, որ երկիրը թույլ է տվել բարեկամ երկրներին, այդ թվում՝ Ռուսաստանին, Հնդկաստանին և Չինաստանին, անցնել Հորմուզի նեղուցով։
Նախարարը նաև անդրադարձել է տարածաշրջանում ընթացող իրադարձություններին։ Նրա խոսքով՝ «Մեր ներկայիս քաղաքականությունը դիմադրությունը շարունակելն է, բանակցություններ չկան։ Սա ո՛չ Իրանի, ո՛չ էլ Ամերիկայի պատերազմն է։ Իսրայելն է ԱՄՆ-ին մղել դրան»։
Արաղչին նշել է, որ ԱՄՆ-ն առաջնահերթություն է տալիս Իսրայելի անվտանգությանը, և տարածաշրջանում գտնվող ամերիկյան բազաները նախատեսված են Թել Ավիվը պաշտպանելու համար։ Նա հավելել է, որ Վաշինգտոնը պատրաստ է զոհաբերել ամեն ինչ Իսրայելի անվտանգության համար։
Նախարարը նաև հակադրել է ԱՄՆ-ի քաղաքականությունը Իսրայելի նպատակներին՝ նշելով, որ «Իսրայելի նպատակն է իրականացնել «Մեծ Իսրայելի նախագիծը», որը ներառում է տարածաշրջանի մի քանի երկրների տարածքները»։