Փետրվարի 22-ի երեկոյան, ժամը 22։40-ի սահմաններում, ոստիկանության Լոռու մարզային վարչություն է ստացվել զեկուցում, որ Վանաձոր քաղաքում տեղի է ունեցել ծեծկռտուք։
Ինչպես պարզվել է, Վանաձոր քաղաքի Ուսանողական 5 հասցեի մոտ անձնական հարցերի շուրջ վիճաբանության ընթացքում մի կողմից՝ Լոռու մարզի բնակիչներ 22-ամյա Տիգրան Բ․-ը, 50-ամյա Մարտիկ Ռ․-ը, 22-ամյա Արմեն Ռ․-ը և 26-ամյա Ասատուր Ռ․-ն, մյուս կողմից՝ 38-ամյա Արշակ Ա․-ն և 45-ամյա Արտակ Ա․-ն վիճաբանության մեջ են մտել։
Վիճաբանությունը սրվել է, և Ասատուր Ռ․-ն դանակով հարվածներ է հասցրել Արշակ Ա․-ին և Արտակ Ա․-ին։ Արդյունքում վերջիններս ստացել են «ակնագնդի տրավմատիկ վնասվածք» և «գլխի գագաթաքունքային կոտրվածք ձախից, կրծքավանդակի ձախ կեսի կտրած չթափանցող վերք» վնասվածքներ, որոնց պատճառով անհապաղ տեղափոխվել են «Վանաձոր» բժշկական կենտրոն։
Դեպքի հետ կապված Լոռու մարզային քրեական ոստիկանության կողմից անհապաղ ձեռնարկվել են միջոցառումներ։ Դրանց արդյունքում ձերբակալվել են Տիգրան Բ․-ը, Ասատուր Ռ․-ը և Արմեն Ռ․-ը։ Ոստիկանությունը շարունակում է աշխատանքները հանցագործության գործիք դանակը հայտնաբերելու ուղղությամբ։
Դեպքի փաստով կազմվել են ամրագրման փաստաթղթեր, որոնք փոխանցվել են ՀՀ Քննչական կոմիտեի Լոռու մարզային քննչական վարչություն։ Կասկածյալները կամ մեղադրվողները համարվում են անմեղ, քանի դեռ նրանց մեղավորությունը չի ապացուցվել դատարանի օրինական ուժի մեջ մտած դատավճռով։