Փետրվարի 19-ին «Իմ քայլը» հիմնադրամի պատվիրակությունը՝ ՀՀ վարչապետի տիկին Աննա Հակոբյանի գլխավորությամբ, Տեխաս նահանգի Ֆորտ Ուորթ քաղաքում հանդիպել է Պատկառելի բուդդայական վանական Բհիկխու Պանակարայի և նրա 24 հոգուց բաղկացած խմբի հետ, ովքեր ավարտել էին իրենց 2300 մղոն (մոտ 3700 կմ) հեռությամբ «Քայլերթ հանուն խաղաղության» առաքելությունը։
Հանդիպումը տեղի էր ունեցել «Huong Dao» տաճարում, որին ներկա էին նաև «Իմ քայլը» հիմնադրամի հոգաբարձուների խորհրդի անդամ Արաքսի Սիմիդյանը, փոխտնօրեն Թալին Թօփալաքեանը, Ֆորտ Ուորթի քաղաքապետը, տաճարի համայնքի ներկայացուցիչները և տարբեր երկրներից ժամանած բուդդայական վանականները, որոնք հատուկ սպասում էին տիկին Հակոբյանի հետ հանդիպմանը՝ նախքան իրենց երկրներ վերադառնալը։
Հանդիպմանը ներկա էր նաև «Խաղաղության շունը»՝ Ալոկան, որը 112 օր շարունակ անբաժան ուղեկից էր եղել վանականներին՝ դառնալով նրանց լուռ, բայց հավատարիմ ընկեր։
Պատկառելի Պանակարան, ամփոփելով իրենց ճանապարհը, նշել է, որ խաղաղությունը պետք է բխի անհատի ներսից՝ մաքուր սրտից։ Նա նաև նշել է, որ մարդկանց աջակցությունը և ուշադրությունը, որը նրանք ստացել են ճանապարհի ընթացքում, անսպասելի և ոգեշնչող է եղել։ «Ես երջանիկ եմ, որ մենք ունենք նույնական առաքելություն և նպատակ։ Խաղաղությունը միայն ազգերի ու երկրների համար չէ, այն ողջ մարդկության համար է»,- ասել է նա։
Աննա Հակոբյանը նշել է, որ 24 ժամ անցկացրել է օդում՝ հասնելու Ֆորտ Ուորթ և հանդիպելու վանականների հետ։ Նա նաև անդրադառնալով իր «Կանայք հանուն խաղաղության» նախաձեռնությանը, նշել է, որ խաղաղությունը պահանջում է հետևողականություն, հավատ, համբերություն և քաջություն։ «Ձեր քայլերն ավելի բարձր ու անկեղծ են հնչում, քան աշխարհի բազմաթիվ հայտարարություններն ու հռչակագրերը»,- ասել է նա՝ ընդգծելով, որ յուրաքանչյուր մարդկային սիրտ կարող է անել քայլ դեպի խաղաղություն։
Հանդիպման հուզիչ պահերից էր Պատկառելի հոգևոր ուսուցիչ Ռաթանագունայի անսպասելի ելույթը, որը նշել է, որ տիկին Հակոբյանի հետ հանդիպումը նրան հանգիստ է թույլ տվել իր առաքելությունը փոխանցել իր աշակերտին՝ Պանակարային։
Պաշտոնական մասից հետո Պատկառելի Պանակարան Հիմնադրամի պատվիրակության համար շրջայց անցկացրել է տաճարի տարածքում։ Հանդիպումն անցավ ջերմ և մտերմիկ մթնոլորտում, որն ամփոփվեց ավանդական վիետնամական հյուրասիրությամբ։