Այսօր՝ մարտի 12-ին, Երևան-Երասխ ավտոճանապարհի վրա տեղի է ունեցել ավտովթար, որի հետևանքով 4 մարդ է տուժել։ Դեպքը տեղի է ունեցել ժամը 20։40-ի սահմաններում՝ Տափերական գյուղի վարչական տարածքում։
«Mercedes» մակնիշի ավտոմեքենան, անհայտ պատճառով, դուրս է եկել ճանապարհի երթևեկելի գոտուց և ընկել ջրատարի մեջ։
Վթարի վայրից ստացված տեղեկությունների համաձայն՝ վիրավորներին օպերատիվորեն տեղափոխել են «Արտաշատ» բժշկական կենտրոն։ 3-ը՝ ավտոմեքենայից դուրս բերել և հիվանդանոց տեղափոխել են ՀՀ ներքին գործերի նախարարության ոստիկանության Պարեկային ծառայության Արարատի մարզի գումարտակի 2-րդ վաշտի պարեկները՝ գումարտակի ծառայության ավագ տեսուչներ Սահակ Թադևոսյանի, Արթուր Կոծինյանի և վաշտի հրամանատարի տեղակալ Հովհաննես Մանսուրյանի գլխավորությամբ։ Մյուս վիրավորին՝ ջրից դուրս բերել են ՀՀ ՆԳՆ փրկարար ծառայության Արարատի հրշեջ փրկարարական ջոկատի փրկարարները՝ մարզային փրկարարական վարչության պետ Կարեն Ավետիսյանի գլխավորությամբ։
Տարածքը սահմանազատել են նույն վաշտի պարեկները։
Վթարի մասին տեղեկությունը փոխանցվել է ՀՀ Քննչական կոմիտեի Արարատի մարզային քննչական վարչության Վեդիի քննչական բաժին, որտեղից ժամանել է քննչական խումբ՝ վարչության պետ Տիգրան Շոխոյանի, վարչության պետ տեղակալ Ներսես Մուրադյանի, Վեդիի քննչական բաժնի պետ Լեռնիկ Վարդանյանի և օրվա հերթապահ քննիչի գլխավորությամբ։
Վթարի փաստով Վեդիի քննչական բաժնում նախաձեռնվել է քրեական վարույթ, որի ընթացքում պարզվում են վարորդի և վիրավորների ինքնությունները։ Ըստ պարեկների տեղեկությունների՝ հիվանդանոց տեղափոխվածներից 3-ը վարորդի կինն ու նրա անչափահաս երեխաներն են, իսկ փրկարարները ջրից դուրս են բերել վարորդի մայրիկին։