Վերջերս Էդմոն Մարուքյանը մի պոդքաստի ժամանակ հարցական տոնով խոսեց Միքայել Աջապահյանի մասին՝ նշելով, թե ինչու նա ժամանակին չհամաձայնեց դառնալ ընդդիմության կողմից առաջարկվող վարչապետի թեկնածու։ Նա կարծում էր, որ եթե Միքայել սրբազանը համաձայնվեր, դեպքերի ընթացքը կարող էր բոլորովին այլ լինել։ Սակայն, ինչպես պարզվում է, Է. Մարուքյանը եւ շատ ուրիշներ չեն տիրապետում եկեղեցու ներքին շրջանակներից եկող տեղեկատվությանը, ինչի արդյունքում նրանք, թերեւս, անարդարացիորեն մեղադրում են Միքայել սրբազանին՝ պատասխանատվություն չստանձնելու եւ քաղաքական պայքարը ղեկավարելու համար։
Իրականում, իմ տեղեկացմամբ, Միքայել Աջապահյանի՝ քաղաքականությամբ զբաղվելու եւ նույնիսկ ընդդիմության առաջին ցուցակի ղեկավար դառնալու հարցը քննարկվել է շատ ավելի վաղուցվանից։ Բայց ամեն անգամ այդ զարգացումները կանխել է Վեհափառը՝ կաթողիկոսը, որը միշտ հստակ դեմ է եղել բարձրաստիճան հոգեւորականների քաղաքական ակտիվությանը եւ իր ձեռքից եկած ամեն ինչով փորձել է դա կասեցնել։ Առհասարակ, եկեղեցու ղեկավարները, նույնիսկ սուր հարցազրույցներից հետո, մշտապես ծանր խոսակցություններ են ունեցել Վեհափառի հետ՝ իրենց գործողությունները համաձայնեցնելու համար։
Շիրակի թեմի առաջնորդի՝ քաղաքականություն մտնելու հարցը հատկապես լուրջ քննարկվեց նրան կալանավորելու օրերին։ Երբ Միքայել սրբազանը պատրաստ էր հայտարարել, որ ստանձնում է վարչապետի թեկնածուի կարգավիճակը, եւ ընդդիմությունը հրապարակավ նման առաջարկներ էր անում, Գարեգին Բ-ն՝ փաստաբան Արա Զոհրաբյանի միջոցով, նրան հորդորել է դա չանել՝ հույս ունենալով, որ այդպիսով կկանխեն կալանքի սանկցիան։ Եվ հենց այդ օրը Միքայել Աջապահյանը գրավոր հրաժարվեց այդ առաջարկից։
Երկրորդ անգամ այդ որոշումը հասունացել է առաջին ատյանի դատավճռի օրը, երբ նրան ազատազարկում տվեցին։ Դատավճռից հետո նա պատրաստել էր հայտարարություն, որում նախատեսում էր հայտարարել քաղաքական պայքարի սկիզբը ռեժիմի դեմ եւ իր պաշտոնավարումը եկեղեցում սառեցնելը։ Սակայն, նույնպես, Վեհափառը բոլոր հնարավոր միջոցներով կանխել է այդ հայտարարությունը։ Այդ անգամ ոչ միայն փաստաբանները, այլեւ Միքայել Աջապահյանի մոտ հեղինակություն վայելող տարբեր անձինք այցելել են նրան եւ հորդորել հետ կանգնելու այդ մտքից՝ նշելով, որ Վեհափառն իր օրհնությունը չի տալիս։