Արդարադատության նախարար Սրբուհի Գալյանը Կառավարության նիստից հետո կայացած մամուլի ասուզումում անդրադառնալով ատելության խոսքի դեմ պայքարի հետ կապված մշակվող նոր նախագծին, պարզաբանեց դրա հիմնական ուղղվածությունը։
Նախարարը նշեց, որ նախագիծը չի վերաբերում հայհոյանքի հետ կապված տուգանքների սահմանմանը, այլ ունի ավելի լայն և խորքային նպատակ՝ պայքարել ատելության խոսքի երևույթի դեմ։
«Նախագծի հիմնական մեխանիզմը ատելության խոսքի հետևանքով առաջացած ոչ նյութական վնասի հատուցման պահանջի ներկայացման հնարավորությունն է քաղաքացիների համար։ Սա նշանակում է, որ ատելության խոսքի հետևանքով վնասված անձը կարող է դիմել դատարան և պահանջել ոչ նյութական վնասի բավարարում, որը կարող է ունենալ նաև դրամական արտահայտություն՝ նմանապես այնպես, ինչպես վիրավորանքի կամ զրպարտության դեպքերում»,- ասաց նա։
Սրբուհի Գալյանը նաև հստակեցրեց, որ ատելության խոսքը վարչական իրավախախտում համարելու հարցը դեռևս քննարկման փուլում է։ Նախագիծը կներկայացվի հանրային քննարկման, որի արդյունքում կորոշվեն անհրաժեշտ լրացումները։
Անդրադառնալով խոսքի ազատության և քրեական պատասխանատվության հարցին՝ նախարարը նորից ընդգծեց, որ Հայաստանում ոչ մի քաղաքացի չի կալանավորվում խոսքի ազատության իրավունքի կիրառման համար։
«Կալանավորվում են այնպիսի արարքներ կամ հայտարարություններ, որոնք ունեն քրեորեն հետապնդելի բնույթ։ Այսինքն՝ կարող է լինել հայտարարություն կամ խոսք, որը, որոշակի պայմաններում, համապատասխանում է քրեական օրենսգրքի որոշակի կետերի և կարգավորումների»,- եզրափակեց նա։