Այսօր՝ մարտի 29-ին, Կոտայքի մարզում տեղի է ունեցել ավտոմեքենայի վրաերթի դեպք, որի հետևանքով վիրավորվել են մայրն ու դուստրը։
Դեպքը տեղի է ունեցել Գողթ բնակավայրի գլխավոր փողոցում, որտեղ «Hyundai Kona» մակնիշի ավտոմեքենան վրաերթի է ենթարկել երկու հետիոտնի։
Ինչպես հայտնի է դարձել, վարորդը փախուստի չի դիմել, անմիջապես ահազանգել է շտապօգնության ծառայությանը և օգնել է օպերատիվորեն ժամանած բժիշկներին։ Գառնիի ամբուլատոր կենտրոնի շտապօգնության բժիշկները վիրավորներից մեկին տեղափոխել են «Սուրբ Գրիգոր Լուսավորիչ» բժշկական կենտրոն, իսկ մյուսին՝ քաղաքացիների օգնությամբ՝ Ուիգմոր Կանանց և Երեխաների հիվանդանոց։
Դեպքի վայրում օպերատիվորեն ժամանել են ՀՀ Ներքին գործերի նախարարության ոստիկանության Պարեկային ծառայության Կոտայքի մարզի գումարտակի 2-րդ վաշտի 1-ին դասակի պարեկները՝ գումարտակի հրամանատար Արբերտ Մարտիրոսյանի, գումարտակի ծառայության ավագ տեսուչ, օրվա պատասխանատու Արտակ Ասատրյանի, գումարտակի ծառայության տեսուչ Կառլեն Բաղյանի և վաշտի հրամանատար Սահակ Գալստյանի գլխավորությամբ։ Տարածքը սահմանազատել են նույն վաշտի ավագ պարեկ Ներսես Ասատրյանը և պարեկ Գարուշ Բաղդասարյանը։
ՀՀ ՆԳՆ ոստիկանության համայնքային ոստիկանության գլխավոր վարչության Գառնիի բաժնի հերթապահ խումբը՝ հատկապես կարևոր գործերով ավագ տեսուչ Արմեն Ավետիսյանի գլխավորությամբ, նույնպես ժամանել է դեպքի վայր։
Դեպքի մասին տեղեկությունը փոխանցվել է ՀՀ Քննչական կոմիտեի Կոտայքի մարզային քննչական վարչության Աբովյանի քննչական բաժին, որտեղից ժամանել է քննչական խումբը՝ վարչության պետ Հովհաննես Չալաբյանի, վարչության պետի տեղակալ Աշոտ Մելքումյանի և հատկապես կարևոր գործերով ավագ քննիչներ Արշակ Շահնազարյանի և Տիգրան Բաղյանի գլխավորությամբ։
Վթարի փաստով Ա․ Շահնազարյանի որոշմամբ նախաձեռնվել է քրեական վարույթ, որտեղ պարզվում են վարորդի և վիրավորների ինքնությունները։ Ըստ նախնական տեղեկությունների՝ վրաերթի ենթարկվածները մայրն ու դուստրն են․ երեխան՝ 8 տարեկան, մայրը՝ 49 տարեկան։
Վարորդը ենթարկվել է սթափության փորձաքննության, որի արդյունքում պարզվել է, որ նա սթափ է եղել։ Քննչականի հանձնարարականով ավտոմեքենան տեղափոխվում է ոստիկանության Կոտայքի բաժնի պահպանվող հատուկ տարածք։