Այսօր Հայաստանի Հանրապետության բանակի կազմավորման 34-րդ տարեդարձն է։ 1992 թվականի հունվարի 28-ին ՀՀ կառավարությունը հրապարակեց «Հայաստանի Հանրապետության պաշտպանության նախարարության մասին» որոշումը, որը նշանավորեց Հայոց բանակի ստեղծումը։
Արցախյան պատերազմների մասնակից, չարեքթարցի Աշոտ Սևյանը խոսելով հայկական բանակի մասին, նշեց, որ վերջին տարիներին փորձում են բանակը թուլացնել և արժեզրկել, սակայն դրա հիմքերը նույնիսկ այսօր այնքան ամուր են, որ ամբողջովին հաջողվել է չի հաջողվում։
«Ես մեր բանակին առաջին հերթին մաղթում եմ հայրենասեր գաղափարներով սպաներ, որոնք օրինակ ծառայելով՝ զինվորներին կծառայեն։ Մենք բոլորն էլ այսօր տեսնում ենք, թե այս իշխանությունն ինչ է ուզում անել բանակին՝ բարոյազրկել, սարքել իր նման՝ ամեն ինչ հանձնող ու ուրացող։ Բանակը միշտ էլ այնպիսին է եղել, որ զինվորը նայել է իր վերադասին։ Չնայած ինքս Խորհրդային Միության բանակում եմ ծառայել, բայց իմ ծառայակիցները պատմում էին Դրոյի, Անդրանիկ Օզանյանի մասին, իսկ մենք էլ միշտ փորձում էինք նմանվել այդ մարդկանց։ Այսօր օրվա իշխանությունն այնպես է արել, որ «հերոս» հասկացությունը վերացել է, իրենց համար հերոսը սովորական հարկատունն է»,- ասաց ազատամարտիկը։
Նրա խոսքով՝ բոլոր ժամանակներում էլ եղել է մեկ պարզ ճշմարտություն, որ զենքը չի պատերազմում, այլ զինվորը։ «Եթե զինվորը պատրաստ չէ պատերազմելու, ապա նրան ինչ տեսակի զենք էլ տաս՝ չի կարողանալու կռվել»,- ընդգծեց Աշոտ Սևյանը։
Նա նաև նշեց, որ այն, որ օրվա իշխանությունը ցանկանում է մասնատել հայկական բանակը, փաստում են նրանց իրականացրած քայլերը։ Օրինակ, գերիների խնդիրը։ «Եթե զինվորը տեսնում է, որ իր իշխանությունը 5 տարի շարունակ չի կարողանում գերիների հարց լուծել, չի կարողանում իր քաղաքացու անվտանգությունն ապահովել, ապա մտածում է՝ ի՞նչ կարիք կա նման երկրի համար կյանքը զոհաբերել»,- ասաց նա։
Ազատամարտիկը նաև նշեց, որ այսօր Պաշտպանության նախարարությունում կան մարդիկ, որոնք չպետք է այնտեղ լինեին, և նրանցից ոմանց հետ նույնիսկ անձամբ խոսել է՝ նրանք չեն հակադարձել, այլ միայն լռել են։
«Այսօր ովքեր Նիկոլին «պատվի» են առնում՝ բանակը նրանց տեղը չէ, մեզ ու բանակին գերագույն գլխավոր հրամատար է պետք։ Դուք այսօր Նիկոլի դեմ եք խոնարհվում, վաղն Ադրբեջանի դեմ ինչպե՞ս եք կանգնելու։ Հայաստանը Նիկոլը գցել է «տուպիկի» մեջ, բայց ամեն ինչ վերջնական կործանված չէ»,- եզրափակեց Աշոտ Սևյանը՝ ընդգծելով, որ զինվորի ոգին տեղն է, և նրա կողքին պետք է լինի գիտակ ու ոգին բարձր առաջնորդ։