ՀՀ ներքին գործերի նախարարությունում (ՆԳՆ) տեղի է ունեցել բարձրաստիճան պաշտոնատար անձանց զանգվածային պաշտոնանկություն։ Այս որոշումները կայացվել են փետրվարի 24-ին ՀՀ ոստիկանության քրեական ոստիկանության գլխավոր վարչության սպայական անձնակազմի հետ անցկացված հրատապ խորհրդակցությունից հետո։
Նախարար Արփինե Սարգսյանը խորհրդակցության ընթացքում հստակ հայտարարել է, որ չի հանդուրժելու այն պաշտոնյաներին, ովքեր թերացել են կամ շարունակում են թերանալ իրենց աշխատանքում։ Նախարարի հրամաններով աշխատանքից ազատվել են մի քանի բարձրաստիճան պաշտոնատար անձինք։
Ազատվել են հետևյալ պաշտոնատար անձինք․
ՀՀ ՆԳՆ ոստիկանության քրեական ոստիկանության գլխավոր վարչության պետ, ոստիկանության պետի տեղակալ Վարդան Վարդանյանը։
ՀՀ ոստիկանության պետի տեղակալ Կարեն Հակոբյանը։
ՆԳՆ ոստիկանության պարեկային ծառայության պետ, ՀՀ ոստիկանության պետի տեղակալ, ոստիկանության գնդապետ Արթուր Խուդինյանը։
ՀՀ ՆԳ նախարարի մեկ այլ հրամանով Կարեն Հակոբյանը, զբաղեցրած պաշտոնից ազատվելուց հետո, նշանակվել է ՀՀ ոստիկանության համայնքային ոստիկանության գլխավոր վարչության պետ, ՀՀ ոստիկանության պետի տեղակալ։
Ըստ տեղեկությունների՝ պաշտոնանկությունների ցանկը կարող է ընդլայնվել։ Չի բացառվում նաև ՆԳՆ քրեական ոստիկանության Երևան քաղաքի վարչության պետ Հայկ Հարությունյանի պաշտոնանկ արվելը, ինչպես նաև Երևանի քրեական վարչություններում սպասվում են նմանատիպ որոշումներ։
Հրատապ խորհրդակցությանը մասնակցել է նաև ՀՀ ՆԳՆ տեղակալ, ոստիկանության պետ, ոստիկանության գեներալ-մայոր Կամո Ցուցուլյանը։