Վերջին օրերին մեր նախարարությունը ստացել է բազմաթիվ հաղորդագրություններ և տեսանյութեր, որոնք ցույց են տալիս, որ ազնվացեղ եղջերուները հաճախ են նկատվում բնակավայրերի հարևանությամբ, իսկ որոշ դեպքերում՝ նույնիսկ բնակելի տարածքներում։ Այս իրավիճակը պահանջում է բարձր զգոնություն և պատասխանատվություն բոլոր քաղաքացիներից։
Ազնվացեղ եղջերուները վայրի կենդանիներ են, որոնց վարքագիծը կարող է լինել անկանխատեսելի, հատկապես մարդու ներկայությամբ կամ աղմուկի պայմաններում։ Նրանց՝ բնակավայրերին մոտենալու պատճառները կարող են լինել տարբեր՝ եղանակային փոփոխություններ, սննդային ռեսուրսների սակավություն կամ կենսամիջավայրի որոշակի փոփոխություններ։
Այդ պատճառով մենք հորդորում ենք բոլոր քաղաքացիներին՝ նման դեպքերում պահպանել անվտանգության կանոնները։ Խնդրում ենք չմոտենալ կենդանիներին և պահպանել անվտանգ հեռավորություն։
Այս զգուշացումը հնչում է այն պահին, երբ ազնվացեղ եղջերուների պահպանման ծրագիրը հաջողություն է գրանցում։ 2025 թվականին բնության մեջ ազատվել է 9 առանձնյակ, և արդեն արձանագրվել է նաև բնության մեջ առաջին ձագի ծնունդը։ Այսօր ազատ պայմաններում ապրում է 18 առանձնյակ, ինչը վկայում է, որ իրականացվող աշխատանքները տալիս են շոշափելի արդյունք։
Հիշեցնենք, որ Կովկասյան ազնվացեղ եղջերուն Հայաստանի կարմիր գրքի գրանցված տեսակ է և պահպանության ներքո գտնվող վայրի կենդանիներից մեկն է։