Արցախցիներից շարունակում ենք ստանալ դժգոհություններ, որ ՀՀ քաղաքացիության ընդունման հարցում նրանց համար միտումնավոր խոչընդոտներ են ստեղծվում։
Հիշեցնենք, որ Փաշինյանի իշխանությունը որոշեց արցախցիներին տրված հայկական անձնագրերը փոխել, քանի որ դրանք տրամադրվել էին 070 կոդով։ 23-ից հետո շարունակ կոչ էր անում փոխել անձնագրերը, իսկ հիմա խոչընդոտում են՝ նոտարների կողմից ձեւական թերություններ հայտնաբերելով, էլեկտրոնային հերթագրումը խափանելով, դիմումներին ամիսներով ընթացք չտալով։
Մեզ հաղորդում են, որ կան մարդիկ, որոնք անցած տարվա նոյեմբերի վերջերին դիմել են քաղաքացիության համար, բայց մինչ օրս չեն ստացել։ Պատկան գերատեսչությունից վերջերս վստահեցրին, որ նման բան չկա, սակայն, արցախցիների հաշվարկներով, այսօրվա դրությամբ առնվազն 19 հազար մարդ դիմել է քաղաքացիության հարցով ու բյուրոկրատական քաշքշուկների մեջ հայտնվել։
Արցախցիները կասկածներ ունեն, որ իշխանությունները հասկացել են՝ նրանք հակաիշխանական դիրքորոշում ունեն, ընդդիմության էլեկտորատն են, ուստի միտումնավոր ձգձգում են նրանց փաստաթղթեր տալը, որպեսզի թույլ չտան, որ հունիսի 7-ի ընտրություններին մասնակցեն։
Ըստ ՆԳՆ-ի՝ 2026 թվականի դրությամբ մոտ 30 հազար արցախցի ՀՀ քաղաքացի է դարձել, որից 9 հազարը՝ երեխա։