Այսօր Հայաստանի վարչապետ Նիկոլ Փաշինյանը հանդիպում է ունեցել Եվրոպական Միության ընդլայնման հարցերով հանձնակատար Մարթա Կոսի գլխավորած պատվիրակության հետ։
Ընդունելության ընթացքում վարչապետը ողջունել է տիկին Կոսի այցը՝ նշելով, որ այն հիանալի առիթ է ստեղծում քննարկելու Հայաստան-ԵՄ հարաբերությունների ընդլայնվող օրակարգը։ Նա ընդգծել է, որ հանդիպման ընթացքում մեծ հետաքրքրությամբ է լսելու տիկին Կոսի տպավորությունները երկկողմ գործընթացների վերաբերյալ և քննարկելու փոխադարձ հետաքրքրություն ներկայացնող բոլոր հարցերը։
Նիկոլ Փաշինյանը վերահաստատել է Հայաստանի կառավարության հանձնառությունը՝ շարունակելու ժողովրդավարական բարեփոխումները, ամրապնդելու օրենքի գերակայությունը և զարգացնելու պետական ինստիտուցիոնալ կարողությունները։
Մարթա Կոսը, իր հերթին, շնորհակալություն է հայտնել ընդունելության համար և նշել, որ ԵՄ-ն բարձր է գնահատում Հայաստանի կողմից իրականացվող բարեփոխումները և դրանց ուղղությամբ դրսևորվող քաղաքական կամքը։ Նա ընդգծել է, որ ԵՄ-ն շարունակելու է աջակցել Հայաստանին երկկողմ համագործակցության ոլորտում, մասնավորապես՝ բարեփոխումների օրակարգին, ինչպես նաև Հայաստանի քաղաքացիական հասարակությանը և անկախ լրատվամիջոցներին։
Հանդիպման ընթացքում զրուցակիցները մանրամասն քննարկել են Հայաստան-ԵՄ համագործակցության օրակարգի ընթացքը, տնտեսական և ներդրումային ծրագրերի ընդլայնման հնարավորությունները, ինչպես նաև վիզաների ազատականացման գործընթացին առնչվող հարցերը։ Անդրադարձ է կատարվել նաև տարածաշրջանային զարգացումներին և խաղաղության հաստատման ուղղությամբ իրականացվող քայլերին։ Մարթա Կոսը հատուկ շեշտել է ԵՄ-ի լիակատար աջակցությունը Հայաստանի կառավարության կողմից խաղաղությանն ուղղված ջանքերին։
Կողմերը կարևորել են շարունակական բարձր մակարդակի երկխոսության պահպանումը և համագործակցության խորացման ուղղությամբ համատեղ ջանքերի հետևողականությունը։