Հայաստանցի գեղասահորդներ Կարինա Ակոպովան և Նիկիտա Ռախմանինը որոշել են հեռացնել «Արցախ» կոմպոզիցիան Իտալիայում ընթացող ձմեռային օլիմպիական խաղերի իրենց կարճ ծրագրից։ Այս քայլը կատարվել է Ադրբեջանի Ազգային օլիմպիական կոմիտեի (ԱՕԿ) ներկայացրած բողոքի արդյունքում։
Ավելի վաղ Ադրբեջանի ԱՕԿ-ն պաշտոնական բողոք էր ներկայացրել Կարինա Ակոպովայի և Նիկիտա Ռախմանինի կողմից Արա Գևորգյանի «Արցախ» երգի օգտագործման դեմ։ Բողոքի հիմնավորումը կայանում էր այն պնդմամբ, որ երգը պարունակում է քաղաքական և անջատողական ենթատեքստ, քանի որ «Արցախը Լեռնային Ղարաբաղի հայկական անվանումն է»։
Միջազգային չմշկասահքի միության (ՄՉՄ) պաշտոնական կայքում Կարինա Ակոպովայի և Նիկիտա Ռախմանինի էջում կարճ ծրագրի երգի վերնագիրը փոխվել է «Երաժշտությունը՝ Արա Գևորգյանի»։ Զույգերի կարճ ծրագրերը կկատարվեն փետրվարի 15-ին։