Երևանի քաղաքապետ Տիգրան Ավինյանը նշել է, որ ընդդիմության կողմից Աջափնյակի մետրոյի կայարանի հարցը բարձրաձայնելը և այլ խոշոր ծրագրերից խոսելը նրան միայն ուրախացնում է։
«Ինչքան ասում եք, որ դա չի լինելու, ես միմիայն ուրախ եմ, որովհետև էն օրվանից, որ սկսվեց էդ մետրոյի կայարանը կառուցվել, ես ուզում եմ այդ դեմքերը տեսնել», – ասաց Ավինյանը Ավագանու նիստին։
Նրա խոսքով՝ ընդդիմության հարցադրումները բնական են, քանի որ այժմ ընթանում է համապետական ընտրությունների նախընտրական շրջանը։
«Ջղաձգումները բնական են․ հիմա համապետական ընտրությունների համար պետք է քասթինգ անցնեն մեր ընդդիմադիր գործընկերները։ Ինչքան խրոխտ ելույթներ ունենաք այստեղից էն թեմաների վերաբերյալ, որ հենց ձեր մերձքաղաքական անձերին են վերաբերում, ինչքան լավ իրենց պաշտպանեք, այնքան բարձր տեղ կունենաք ընտրություններին՝ տարբեր կուսակցությունների ցուցակում»,- ավելացրեց քաղաքապետը։