Մեր կողմից Լոռու մարզի զարգացման հարցերով ուղղված հարցադրումներին եւ հարցազրույցի առաջարկին մարզպետի կողմից անմիջական պատասխան չստանալուց հետո, մենք ստացել ենք գրավոր արձագանք մարզպետի աշխատակազմից։
Արձագանքում նշվում է, որ մարզում տարբեր ոլորտներում գրանցված արդյունքների վերաբերյալ տեղեկատվությունը հրապարակվում է պաշտոնական կայքում եւ սոցիալական հարթակներում՝ ամենօրյա ռեժիմով։ Ընդգծվում է, որ մարզպետի աշխատակազմն իր լիազորությունների սահմաններում աջակցում է ներդրումային ծրագրերի իրականացմանը, սակայն աշխատատեղեր ստեղծելու եւ արտադրական ձեռնարկություններ գործարկելու գործառույթ չունի։ Բացի այդ, նշվում է, որ բոլոր 11 համայնքապետարանների հետ առկա են սերտ աշխատանքային հարաբերություններ, իսկ տպագիր լրատվամիջոցների հետեւելու անհրաժեշտություն չկա, քանի որ տեղեկատվությունը հասանելի է առցանց։
Այս արձագանքը կարելի է համարել որպես առաջընթաց՝ քանի որ մեր հարցադրումները չեն մնացել անպատասխան։ Սակայն պետք է նշել, որ այն հիմնականում ընդհանուր բնույթի է եւ չի անդրադառնում մեր կոնկրետ հարցերին։
Մենք հետաքրքրվել էինք, թե ինչ չափելի արդյունքներ են արձանագրվել մարզպետի պաշտոնավարման ընթացքում, քանի նոր աշխատատեղ է ստեղծվել, ինչ ներդրումների մասին է խոսքը՝ թվերով եւ ծրագրերով, ինչ քայլեր են ձեռնարկվում՝ նախկին արտադրական հզորությունների վերագործարկման ուղղությամբ։
Այն փաստը, որ տեղեկատվությունը հրապարակվում է կայքում կամ սոցցանցերում, չի փոխարինում ուղիղ եւ ամբողջական պատասխանին, երբ լրատվամիջոցը հարց է ուղղում հանրության անունից։ Հանրային պաշտոն զբաղեցնող անձի աշխատանքի կարեւոր բաղադրիչներից մեկը հաշվետվողականությունն է, որը պարզապես հաղորդագրությունների տարածումը չէ, այլեւ հարցուպատասխանի ձեւաչափով փոխազդեցություն լրատվամիջոցների հետ։
Մենք հույս ունենք, որ մարզպետարանի այս արձագանքը ցույց է տալիս պատրաստակամություն՝ գոնե ընդհանուր դիրքորոշում ներկայացնելու եւ լրագրողի հետաքրքրությունը բավարարելու։ Հույս ունենք, որ հաջորդ փուլում արդեն ավելի առարկայական եւ թվերով հիմնավորված պատասխաններ կստանանք, եւ գուցե մարզպետը համարձակություն ձեռք բերի եւ ուղիղ հանդիպի լրագրողի հետ՝ դեմառդեմ պատասխանելով նրա հարցերին։
Մեր թիմը շարունակելու է լուսաբանել Լոռու մարզի խնդիրները եւ պաշտոնական պարզաբանումներ ստանալու ջանքերը։ Վստահ ենք՝ որքան բաց եւ փաստարկված լինի լրատվամիջոցներ-մարզպետարան երկխոսությունը, այնքան դրանից կշահի հանրությունը։