ՀՀ քրեական օրենսգրքի 452-րդ հոդվածի 3-րդ մասով մեղադրանք է առաջադրվել Գյուլագարակի համայնքապետի տեղակալ, Քաղաքացիական պայմանագիր (ՔՊ) կուսակցության անդամ Արմեն Մարիկյանին։
Ըստ դատական փաստաթղթերի՝ 2023 թվականի հունիսի 4-ին, ժամը 17:00-ի սահմաններում, Մարիկյանը, գտնվելով ոչ սթափ վիճակում, իր ընկերների՝ Արմեն Մուրադյանի, Աշոտ Մուրադյանի եւ Մարատ Սուքիասյանի հետ միասին ծեծի ենթարկել է Ստեփանավանի Դենդրոպարկի մոտակայքում ծառայություն իրականացնող պարեկներին։ Նա խոչընդոտել է պարեկային ծառայության աշխատանքներին, հնչեցրել սպառնալիքներ եւ բռնություն գործադրել նրանց նկատմամբ։ Դեպքի հետեւանքով Աշոտ Մուրադյանը փախուստի է դիմել։
Այս գործը ներկայումս գտնվում է դատաքննության փուլում։
Մեկ այլ քրեական գործով էլ է Մարիկյանն անցել։ Նրան մեղադրում են տրանսպորտային միջոց վարելու իրավունք չունենալու եւ գտնվելով ոչ սթափ վիճակում մեքենա վարելու համար։ Այս գործով դատարանը նրան տուգանք է նշանակել՝ 340 հազար դրամի չափով։
Այս դեպքը նմանատիպ արարքների համար պատժվող մյուս պարագաների շարքին է ավելանում։ Օրինակ, ամիսներ առաջ Արմավիրի Խոյ համայնքի ղեկավար Լյուդվիգ Յայլոյանի ազգականներն էին ձերբակալվել եւ ազատ արձակվել՝ պարեկին ծեծելու համար։
Նմանատիպ աղմկոտ պատմություն է եղել նաեւ Շիրակի մարզում։ Այս անգամ «հերոսն» Շիրակի մարզպետ Դավիթ Առուշանյանի խորհրդական Գոռ Սարոյանն էր, որը վերջերս է ազատվել աշխատանքից։ Նրա դեմ քրեական գործ է հարուցվել՝ խուլիգանության (ՔՕ 297-րդ հոդված) եւ պաշտոնատար անձին դիմադրություն ցույց տալու (ՔՕ 452-րդ հոդված) մեղադրանքներով։ Սարոյանն այս դեպքից առաջ եւս մեկ անգամ հայտնվել էր դատարանում մեղադրյալի աթոռին։