Փետրվարի 22-ին, ժամը 15:32-ին, ՆԳՆ 112 օպերատիվ կառավարման կենտրոն ստացել է ահազանգ՝ Հաղթանակի կամրջից մարդու ինքնասպանության փորձի մասին։
Այս մասին տեղեկացնում է ՆԳՆ Պետական փրկարարական ծառայությունը։
Դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ, ինչպես նաև Հոգեբանական աջակցության և բժշկական ապահովման վարչության հերթապահ խումբը։
Մինչ փրկարարների կանչի վայր հասնելը՝ քաղաքացին նետվել է կամրջից։ Փրկարարները դուրս են բերել դին Հրազդան գետից և պատգարակով մոտեցրել դի տեղափոխող ավտոմեքենային։
Դեպքի վայրում գտնվող հերթապահ հոգեբանը հոգեբանական աջակցություն է ցուցաբերել երեք քաղաքացու։