ՀՀ աշխատանքի և սոցիալական հարցերի նախարար Արսեն Թորոսյանը խորհրդարանում լրագրողների հետ զրույցի ընթացքում արձագանքեց մամուլի հրապարակումներին, որոնք վերաբերում էին նրա կողմից գնված 10 հազար դոլարանոց հեծանիվին։
Նախարարը հարցին արձագանքեց հեգնանքով՝ նշելով, որ հեծանիվի գնի հարցը ավելի լավ է համեմատել «Ռոլս Ռոյսի» փոքր տեսակին։
«Իմ հեծանիվի գումարը իմ հայտարարագրում գրված է, ես դրան արդեն անդրադարձել եմ։ Ես շատ ուրախ եմ, որ մամուլը այլևս չի կարող մեզ մեղադրել, օրինակ, անհայտ փողերով 200 000 դոլարանոց մեքենա առնելու մեջ, և մեղադրում է մեր սեփական աշխատած փողերով հեծանիվ առնելու մեջ։ Իմ հայտարարագրի մեջ գումարը գրված է, 10 000 չէ, 7000 եվրո է։ Իմ նախասիրությունն է, դա եմ առել։ 7000 եվրոյի ավտո չեմ առել, դա եմ առել։ Հիմա որ ասեի՝ 20 000 եվրոյանոց ավտո եմ առել՝ ճոխությո՞ւն է, թե ճոխություն չի։ Կամ՝ 1000 դոլարանոց ժամացույցը ճոխությո՞ւն է, թե ճոխություն չի։ Իմ օրինական եկամուտներով գնված գույք է, ի՞նչ կապ ունի՝ ճոխություն է, թե ճոխություն չի»,- ասաց նա։
Այսօր խորհրդարան նախարարը հանդես չէր գալիս հիշյալ հեծանիվով՝ բացատրելով, որ «դեռ ցուրտ է»։ Նա նաև հայտարարեց, որ պաշտոնյա դառնալուց առաջ աշխատում էր և ստանում էր շատ ավելի բարձր աշխատավարձ։