Արվեստագետ Վրեժ Քասունուի անհատական ցուցահանդեսը, որը կոչվում է «Նստվածք», հաջողությամբ բացվեց Գեղագիտության ազգային կենտրոնում։ Սա հեղինակի առաջին անհատական ցուցադրությունն է, որի կազմակերպումն իրականացրել է Սոնա Հարությունյանը։
Ցուցահանդեսը նվիրված է հիշողությունների եւ անցյալի ապրումների թողած «նստվածքների» թեմային։ Իր աշխատանքների մասին խոսելիս Վրեժ Քասունուն նշել է, որ դրանք ոգեշնչված են եղել Զիգմունդ Ֆրոյդի եւ Ալբերտ Էյնշտեյնի փիլիսոփայական մտքերից, որոնց համաձայն՝ ժամանակի ընթացքում բոլոր նստվածքները վերածվում են արվեստի։ Ըստ հեղինակի՝ նրա ստեղծագործությունները նաեւ ոգեշնչված են եղել գրող Ֆրանց Կաֆկայի ստեղծագործություններով։
Ցուցադրության կենտրոնում է ագռավը։ Վրեժ Քասունուն բացատրել է, որ ընտրել է հենց այս կերպարը, քանի որ ագռավը համարվում է ամենաերկարակյաց կենդանիներից մեկը եւ ունի հիշողություն։ Ցուցահանդեսում ներկայացված աշխատանքները ստեղծվել են 2019 թվականից մինչեւ 2026 թվականը։
Հետաքրքրական է, որ ցուցահանդեսին իր մի քանի նկարով մասնակցում էր նաեւ Վրեժ Քասունուի 7-ամյա որդին։
«Նստվածք» ցուցահանդեսը կլինի բաց մինչեւ մայիսի 4-ը։