Համայնքային ոստիկանության Արթիկի բաժնում ստացված տեղեկատվության համաձայն՝ Քրեական ոստիկանության Շիրակի մարզային վարչության հետ համատեղ իրականացված միջոցառման ընթացքում պարզվել է, որ Փոքր Մանթաշ գյուղի բնակիչ 39-ամյա տղամարդը նախնական պայմանավորվածությամբ ապրիլի 11-ին Երևանի Ազատության հրապարակում կուսակցություններից մեկի կազմակերպած հանրահավաքին մասնակցելու համար նյութապես շահագրգռել է իր համագյուղացիներից 12 հոգու, այդ թվում՝ անչափահասների։
Ինչպես հայտնի է դարձել, տղամարդը խոստանալով գումար՝ համոզել է իր համագյուղացիներին մասնակցել հանրահավաքին։ Այս գործարքն իրականացնելու հարցում նրան օժանդակել են ընտանիքի անդամները։
Հաղորդվում է, որ երկու տղամարդու ավտոմեքենաներով նրանք մեկնել են Երևան, մասնակցել են հանրահավաքին, իսկ վերադառնալիս 39-ամյա տղամարդը տան բակում չափահասներին վճարել է 10.000 դրամ, իսկ անչափահասներին՝ 5000 դրամ, խոստանալով հետագայում նույնպես դրամական աջակցություն։
Դեպքին առնչվող 12 անձանցից ընդունվել են նույն բովանդակությամբ հաղորդումներ, որոնք փոխանցվել են նախաքննական մարմին։
Ընտանիքի չորս անդամների նկատմամբ հարուցվել է հանրային քրեական հետապնդում՝ Քրեական օրենսգրքի 236-րդ հոդվածի 2-րդ մասի՝ հավաքին մասնակցելու նպատակով նյութապես շահագրգռելու հատկանիշներով։ 39-ամյա տղամարդու նկատմամբ որպես խափանման միջոց կիրառվել են տնային կալանքը և բացակայելու արգելքը, նրա մոր և քրոջ նկատմամբ՝ վարչական հսկողությունը և բացակայելու արգելքը, իսկ ընտանիքի անչափահաս անդամի նկատմամբ՝ դաստիարակչական հսկողությունը։
Նախաքննությունը շարունակվում է։