Ապրիլի 21-ին Բյուրեղավան համայնքում արձանագրվել են աղիքային վարակիչ հիվանդության դեպքեր։ Իրավիճակը վերահսկողության տակ է, բռնկման ակտիվ տարածում չի արձանագրվում, և համաճարակաբանական տվյալները վկայում են գործընթացի մարումի մասին։
Հիվանդությունների վերահսկման և կանխարգելման ազգային կենտրոնում (ՀՎԿԱԿ) իրականացվել է խմելու ջրի նմուշառում, որի արդյունքում հայտնաբերվել են շեղումներ՝ կոլիֆորմ մանրէներ։ Բացի այդ, կենսաբանական նմուշների հետազոտություններով հայտնաբերվել են նաև ռոտավիրուս, ադենովիրուս, ինչպես նաև էնտերոհեմորագիկ և էնտերոախտածին կոլի խմբի ախտածիններ։
Ապրիլի 21-ի երեկոյան, ժամը 19:00-ից մինչև 23:00-ը, Բյուրեղավանում արձանագրվել է շտապօգնության բազմաթիվ կանչեր՝ փսխումներ, սրտխառնոց, ջերմություն և լուծի սիմպտոմներով։ Կանչերի թիվը հասել է 30-ի։ Պատասխանատու մարմինները իրավիճակի մասին անհապաղ տեղեկացրել են ՀՎԿԱԿ-ին։
Ներկայում բուժօգնության դիմած բուժառուների վիճակը բավարար է, նոր դեպքեր չեն արձանագրվել, և հոսպիտալացված է 11 անձ։
Համայնքապետարանը և պոլիկլինիկայի տնօրենը նախքան ջրի նմուշների վերլուծության արդյունքների ստացումը հորդորում են բնակիչներին չօգտագործել խմելու ջուր կամ այն օգտագործելուց առաջ եռացնել։
«Վեոլիա Ջուր» ընկերությունը հայտնում է, որ Բյուրեղավանում խմելու ջրի հետ կապված որևէ շեղում չի հայտնաբերել։