Արցախի նախկին պետնախարար Ռուբեն Վարդանյանին տեղափոխել են Բաքվի Ղարադաղի շրջանի Ումբակի բանտային համալիր։ Այս փոփոխությունը, որը որակվում է որպես «անհանգստացնող և մտահոգիչ», հայտնի է դարձել ՄԻԵԴ-ում հայ գերիների շահերի ներկայացուցիչ Սիրանուշ Սահակյանի կողմից։
Ըստ Սահակյանի՝ Ռուբեն Վարդանյանին Ազգային անվտանգության ծառայության ենթակայության ներքո գտնվող քննչական մեկուսարանից տեղափոխել են արդարադատության նախարարության ենթակայության քրեակատարողական հիմնարկ՝ Ումբակի բանտային համալիր։ Նրա խոսքով՝ այս հաստատություն են տեղափոխվել նաև այլ հայ գերիներ։
«Մեր տեղեկություններով՝ նոր հաստատությունում նրա և մյուս գերիների պահման պայմանների, առողջության, բժշկական օգնության հասանելիության և տարրական կենսապայմանների մասին որևէ տեղեկություն չկա։ Այս հարցում ևս թափանցիկություն չկա, ինչը խախտում է միջազգային իրավունքի նորմերով սահմանված երաշխիքները»,– նշել է Սահակյանը՝ հավելելով, որ ընտանիքի անդամների հետ հեռախոսազանգերը պահպանվում են, սակայն անմիջական դիտարկման միջոցով տեղեկություններ հավաքագրող կառույց գոյություն չունի։
Սահակյանը նաև հայտնել է, որ Ռուբեն Վարդանյանին դեռևս չեն տրամադրել դատավճիռները, թեպետ ՄԻԵԴ-ը պարտավորեցրել է Բաքվին դրանք տրամադրել մինչև օգոստոսի 31-ը։ Նրա խոսքով՝ չնայած Ադրբեջանը փորձում է չեղարկել գերիների պաշտպանության միջոցները, իրենք դեռևս կարողանում են հիմնավորել դրանց պահպանման անհրաժեշտությունը՝ ելնելով խոշտանգումների և անմիջական վտանգի ռիսկերից։
Հիշեցնենք, որ պաշտոնական տվյալներով՝ Ադրբեջանում 19 հայ գերի կա։ Արցախի նախկին ռազմաքաղաքական առաջնորդների գործով «դատավարությունը», որը Բաքվում սկսվել էր 2025 թվականի հունվարին, ավարտվեց այս տարվա փետրվարի 5-ին։ Դատավճիռներ են կայացվել 19 հայ գերիի նկատմամբ, որոնցից 11-ը քաղաքացիական են։