Այսօր Շիրակի մարզում տեղի է ունեցել երկու առանձին ողբերգական դեպք, որոնց հետևանքով երկու դպրոցահասակ տղաներ են ստացել ծանր վնասվածքներ։
Առաջին դեպքը տեղի է ունեցել Անի խոշորացված համայնքի կազմում գտնվող Քարաբերդ բնակավայրում։ 14 տարեկան տղան ավտոմեքենայի տակ է ընկել՝ ստանալով բազմաթիվ վնասվածքներ՝ հատկապես գլխի և կրծքավանդակի հատվածում։
Երկրորդ դեպքը տեղի է ունեցել Գյումրի քաղաքում՝ թիվ 11 դպրոցի դիմաց։ 10 տարեկան տղան, որի մասին տեղեկություններով Արցախից է, գլխի վնասվածքներով անհապաղ տեղափոխվել է Գյումրի բժշկական կենտրոնի մանկական բաժանմունք։
Գյումրի բժշկական կենտրոնի փոխտնօրեն Արմեն Խաչատրյանը հայտնում է, որ 10 տարեկան տղային անհապաղ տեղափոխել են Երևան՝ «Սուրբ Աստվածամայր» բժշկական կենտրոն, որտեղ նրան կապահովեն մասնագիտացված բուժում։ Նախատեսվում է նույն կենտրոն տեղափոխել նաև 14 տարեկան տղային։