ՀՀ կառավարության 2021-2026 թթ. ծրագրով նախատեսված «Made in Armenia» բրենդի կայացման ուղղությամբ իրականացվելիք միջոցառումները փաստացի չեն իրականացվել։ Այս մասին հայտնում է ՀՀ էկոնոմիկայի նախարարությունը՝ պատասխանելով իմ հարցմանը։
Իմ հարցման համաձայն՝ նախարարությանը պահանջվել էր տրամադրել տեղեկություն 2021 թվականից ի վեր իրականացված կոնկրետ միջոցառումների, մշակված հայեցակարգերի, ռազմավարությունների, տարբերանշանների կամ բրենդբուքերի, հատկացված ֆինանսավորման, կնքված պայմանագրերի և արձանագրված չափելի արդյունքների մասին։
Նախարարության պատասխանից պարզվում է, որ «Made in Armenia» բրենդի կայացման նպատակով 2021 թվականին նախատեսված միջոցառումը հետագայում չեղարկվել է։ Հետևաբար, տվյալ շրջանակում պայմանագիր կնքված չէր, և պետական բյուջեի միջոցներով ծրագրային վճարումներ կատարվելու անհրաժեշտություն չի եղել։
Նախարարությունը նաև տեղեկացրել է, որ նշված նախաձեռնության շրջանակում 2021 թվականին իրականացվել են միայն սահմանափակ՝ հանրային իրազեկման, տեղեկատվական և կազմակերպչական բնույթի աշխատանքներ։ Այդ աշխատանքների համար «Մարօգ մարքեթինգ» ՍՊԸ-ի հետ կնքված պայմանագրի շրջանակում կատարվել է ընդամենը 558,420 դրամի ծախս։
Այսպիսով, նախարարության ներկայացրած տվյալներով՝ 2021 թվականից մինչ օրս այս ուղղությամբ հստակ պետական ռազմավարության, հաստատված հայեցակարգի, առանձին բրենդային քաղաքականության կամ չափելի արդյունքների մասին տվյալ չի ներկայացվել։
ՀՀ էկոնոմիկայի նախարարությունը նշել է նաև միջազգային ուղղությամբ իրականացվող միջոցառումների մասին։ Ըստ նախարարության՝ 2021-2025 թվականներին հայկական տեքստիլ արդյունաբերության ոլորտի ընկերությունները մասնակցել են միջազգային ցուցահանդեսների՝ ազգային տաղավարի ձևաչափով։ Այդ մասնակցությունը, նախարարության հայտարարությամբ, միտված է եղել հայկական բրենդների ճանաչելիության բարձրացմանը, արտահանման խթանմանը և միջազգային գնորդների հետ կապերի հաստատմանը։ Միաժամանակ նշվել է, որ Միջազգային առևտրի կենտրոնի հետ համագործակցությամբ մշակվել են ցուցահանդեսների մասնակցության ուղեցույց և միասնական հայկական տաղավարի բրենդբուք։