Երևան, մարտի 16-ին։ Դատական գործընթաց է մեկնարկել, որի կենտրոնում են Սյունիքի նախկին մարզպետ Վահե Հակոբյանը և «Քաղաքացիական պայմանագիր» խմբակցության պատգամավոր Արմեն Խաչատրյանը։
Ինչպես տեղեկանում ենք «Դատալեքս» դատական տեղեկատվական համակարգից, Վահե Հակոբյանը դիմել է դատարան՝ պահանջելով Արմեն Խաչատրյանից հերքել իր ֆեյսբուքյան գրառման մեջ ներկայացված տվյալները։ Հայցադիմումը ստացվել է մարտի 13-ին և մակագրվել Երևանի քաղաքացիական դատարանի դատավոր Գայանե Մազմանյանին։
Հայցի հիմքում ընկած է փետրվարի 17-ին հրապարակված դատախազության հաղորդագրությունը, որում նշվում էր Վահե Հակոբյանից շուրջ 21 մլն դոլար գումարի և գույքի բռնագանձման պահանջի մասին։
Արմեն Խաչատրյանը, տարածելով այդ հաղորդագրությունը, ֆեյսբուքյան իր գրառման մեջ նշել էր, թե Վահե Հակոբյանը «օգտվելով երկրում ստեղծված վիճակից, փորձում էր Սյունիքը դարձնել պետության դեմ պայքարի օջախ և պառակտել երկիրը»։
Վահե Հակոբյանը դատական գործում պահանջում է ոչ միայն հրապարակավ հերք, այլև 1 միլիոն ՀՀ դրամ՝ որպես զրպարտության հետևանքով առաջացած վնասի փոխհատուցում։